Телемедицината помага да се изгради поиздржлив систем на здравствена заштита

Скопје, 25 јули 2022: УНИЦЕФ и Министерството за здравство, во партнерство со Македонското лекарско друштво, поддржуваат низа работилници за обука со кои се надградува знаењето и вештините на матичните лекари за делотворна употреба на технологијата во давањето здравствени услуги од далечина. Телемедицината е практика во медицината кога лекар на една локација користи телекомуникациска инфраструктура за да пружи нега на пациент што се наоѓа на друго оддалечено место.

Оваа иницијатива има за цел да понуди алтернатива на традиционалните здравствени консултации лице в лице во случаи кога физичкото присуство не е можно, или не е нужно, и да го прошири правичниот пристап до здравствените услуги за сите семејства без разлика каде се наоѓаат.

За време на пандемијата со КОВИД-19 семејствата се соочија со огромни нарушувања во системот на здравствена заштита, директно, поради појавата на заразната болест, но и индиректно, поради јавно-здравствените мерки за ублажување на ризиците од инфекција. Ова доведе до значителни намалувања на испораката на здравствени услуги за децата и семејствата. Дигиталната технологија и новите модели на здравствена грижа за кратко време беа пуштени во употреба во бројни држави со цел да се надминат овие тешкотии што ги предизвика пандемијата, и се покажаа ефикасни во обезбедувањето издржливост на здравствениот систем при евентуални идни нарушувања.

Дигиталните здравствени интервенции не претставуваат замена за функционални здравствени системи, но телемедицината нуди големи придобивки првенствено во обезбедувањето здравствени услуги за ранливите и за оние што живеат во оддалечени подрачја, особено семејствата со деца со попреченост и семејствата во ризик. Може да помогне да се избегнат непотребни упатувања на пациенти помеѓу различни нивоа на здравствена заштита, да се намали оптовареноста на здравствениот систем по пандемијата од КОВИД-19, да се поштедат семејствата од финансиски тешкотии доколку се принудени да патуваат за да добијат услуги, и да се избегнат преполни чекалници. Но, намерата не е телемедицината да ги замени консултациите со лично присуство, туку да ги надополни.

Досега околу 150 матични лекари учествуваа на работилниците фокусирани на три главни области: клучните принципи на телемедицината; развој на вештини за делотворна комуникација со пациентите од далечина; и практична употреба на модулот за телемедицина преку државниот електронски систем „Мој термин“.

Работилниците се акредитирани и сертифицирани од Лекарската комора на Република Северна Македонија, а по успешното завршување матичните лекари ќе можат да заведуваат здравствена евиденција преку софтвер изработен од Светската здравствена организација во рамките на опцијата телемедицина во „Мој термин“. До крајот на годината се очекува 70% од матичните лекари да ги изградат своите капацитети за давање телемедицински услуги на децата и нивните семејства.

Програмската компонента за телемедицина е дел од пошироката соработка на УНИЦЕФ со Министерството за здравство и е финансирана од Агенцијата за меѓународен развој на Соединетите Американски Држави