Во Кочани отворен Центар за ментално здравје во заедницата

На отворањето,  кратко обраќање имаа министерот за здравство д-р Беки Сали и специјалната претставничка и в.д. шефица на канцеларијата на СЗО д-р Ане Јохансен.

„Центарот ќе работи 24 часа на ден, седум дена неделно за да им обезбеди на граѓаните континуирана грижа и поддршка за менталното здравје во заедницата, вклучувајќи и услуги за кризни ситуации. Тој е дизајниран да создаде структура и средина каде луѓето со ментални нарушувања ќе можат да ги одржуваат семејните односи, пријателствата и работните места додека примаат третман“, рече министерот Сали. „Во претстојниот период вакви центри ќе бидат отворени и во Битола, Куманово и Штип“.

Иако неодамна во Северна Македонија е постигнат значителен напредок во областа на менталното здравје, пандемијата со КОВИД-19 го оптовари здравствениот систем на претходно незапаметен начин и предизвика нарушување на многу основни здравствени услуги, вклучувајќи ги и оние за ментално здравје.

„Пандемијата со КОВИД-19 создаде глобална криза за менталното здравје, поттикна краткорочен и долгорочен стрес и го наруши менталното здравје на милиони луѓе ширум светот, вклучително и во Северна Македонија“, рече д-р Јохансен. „Потребата од подобрување на услугите за ментално здравје сега е повеќе од очигледна. Со формирањето на овие центри и со зајакнување на грижата за менталното здравје во заедницата во центрите што веќе се формирани, имаме можност да оствариме значаен напредок кон подобро ментално здравје за населението во Северна Македонија“

Создавањето мрежи на меѓусебно поврзани услуги во заедницата е важен чекор кон тоа да се обезбеди дека сите имаат пристап до грижа за менталното здравје која им е потребна.

„За жал, стигмата и дискриминацијата и понатаму се пречка за општествената инклузија и пристап до соодветни услуги за ментално здравје. Ги поттикнуваме сите да побараат помош доколку имаат потреба“.рече д-р Стојан Бајрактаров, лице за контакт со СЗО во областа на менталното здравје и претседател на Комисијата за ментално здравје при Министерството за здравство.

Зајакнување на услугите за ментално здравје во заедницата и натамошно отворање на дополнителни центри за ментално здравје во заедницата е предвидено во Националната стратегија за унапредување на менталното здравје во Република Северна Македонија (2018–2025) донесена од Владата на Северна Македонија во 2017 година. Стратегијата предвидува децентрализација на грижата за менталното здравје како една од приоритетните области. Во претстојниот период, Министерството за здравство со поддршка од агенциите на ОН, СЗО, УНИЦЕФ и УНФПА ќе се фокусира и на областа на зајакнување на услугите за ментално здравје за деца и адолесценти.

Настанот беше организиран во пресрет на Светскиот ден на менталното здравје кој се одбележува секоја година на 10 октомври. Оваа година, Светскиот ден на менталното здравје е посветен на темата „Да го направиме менталното здравје глобален приоритет за сите“. Со оваа тема се препознава потребата менталното здравје да биде ценето, унапредено и заштитено, бидејќи е неопходно за нашата севкупна добросостојба и е подеднакво важно како и физичкото здравје.

Одбележувањето на Светскиот ден на менталното здравје е можност за луѓето со ментални здравствени состојби, застапниците, владите, работодавачите, вработените и другите засегнати страни да се здружат за да го утврдат напредокот на ова поле и јасно да наведат што треба да се направи за менталното здравје и добросостојбата да станат глобален приоритет за сите.

„Светскиот ден на менталното здравје е одлична можност колективно да ја зголемиме свеста за важноста на заштитата на менталното здравје и посветено да работиме на тоа сите да имаат еднакви можности да уживаат во менталното здравје и да ги остварат своите човекови права“, додава д-р Бајрактаров.