Новата резолуција за миграциски политики 2021-2025 усвоена од Собранието

Целта на Резолуцијата е да се создадат институционални и други предуслови за развој на одржлива и сеопфатна рамка за управување со регуларните и нерегуларните надворешни миграции, и за да се унапреди развојот во земјата. Резолуцијата вклучува пет стратешки области: Рамка за поддршка; Сигурни и релевантни податоци за надворешни миграции; Управување со редовните миграции; Контрола и управување со нерегуларните миграции; и Градење партнерства и меѓународна соработка и голем број стратешки цели.

Документот ги прикажува и релевантните аспекти за следење и оценување на напредокот во спроведувањето на мерките и активностите од миграциската политика, финансирањето, информирањето на јавноста за целите и резултатите од миграциската политика, како и за можните предизвици при нејзиното спроведување. Во Акцискиот план за миграциската политика на Република Северна Македонија за периодот 2021-2025 година, мерките и активностите се идентификувани врз основа на секоја од стратешките области, стратешките цели и конкретните стратешки цели коишто треба да обезбедат ефикасно управување со миграциските процеси.

„Го поздравуваме усвојувањето на Резолуцијата за миграциска политика на Северна Македонија  каде што се дефинираат стратешките цели и планираните активности на институционалните чинители за периодот 2021-2025 година. Политиката за миграција, којашто е усвоена од Собранието, гарантира дека се воспоставени системските услови за добро управување со миграциите, фокусирајќи се на зајакнување на капацитетите за управување со миграциите, управување со податоците за миграциите, факторинг на развојните аспекти на миграцијата и унапредување на партнерствата и меѓународната соработка“, изјави Соња Божиновска Петрушевска, раководител на ИОМ во Северна Македонија.

Резолуцијата за миграциската политика на Република Северна Македонија 2021-2025 година е подготвена од владиното тело за развој и спроведување на миграциската политика на Република Северна Македонија со поддршка на Заедничката програма „Планирање на миграциска политика заснована на докази во Република Северна Македонија“, финансирана од Повеќе-партнерскиот фонд за миграции, a имплементирана заеднички од Меѓународната организација за миграции, УНХЦР и УНФПА, чијашто цел е поддршка на националните институции во подобрување на управувањето со демографската и миграциската динамика во земјата.