Голем интерес за мобилните гинеколошки амбуланти

Од тој ден, па се до денес во подвижната клиника бесплатно се вршат прегледи на жени за рано откривање на ракот на грлото на матката. Во меѓувреме на терен се вклучи и уште една мобилна амбуланта и бројот на жени кои се прегледуваат секојдневно расте. Бесплатни гинеколошки прегледи се овозможени за жените во Свети Николе, Градско и во Врапчиште, но и за оние во Лозово.

„ Се уште сме во време на пандемија и ограниченоста односно недостапноста на услугите од сексуално и репродуктивно здравје,  е всушност тоа што не натера да се мобилизираме, клиниките да ги направиме мобилни, да одиме на терен, за жените да не доаѓаат и со тоа да се намали ризикот од пренос на инфекции но и да се подобри нивното здравје“ вели проф, д-р Глигор Тофоски, претседател на Македонска асоцијација на гинеколози и акушерки

Функционирањето на мобилните амбуланти е овозможено со поддршка на Министерството за здравство,Македонската асоцијација на гинеколози и опстетичари –МАГО,Македонското лекарско друштво, Црвениот крст и  УНФПА – Фондот за население на Обединетите нации .

Присуството на мобилните амбуланти во нивното родното место, го зголеми интересот кај жените за превентивни гинеколошки прегледи. Само во Свети Николе, каде што беше првата дестинација, беа прегледани повеќе од 220 жени. Меѓу нив имаше и жени кои со години не биле на преглед. Дел од нив, со оглед на наодот добија упат да направат дополнителна евалуација или итна интервенција на УГАК.

Според докторите, причина за високата бројка на заболени жени е што и покрај програмите за скрининзи околу 40 проценти од жените немаат матични гинеколози ниту се опфатени со  овие скринизни и на доктор се јавуваат многу доцна.

„Откако увидовме дека потребата е огромна и дека има интерес, се работи на изнаоѓање дополнителни модалитети и средства овие мобилни гинеколошки амбуланти да останат во функција и дополнително да го прошириме полето на делување со цел да се доближиме до најмаргинализираните и да се осигураме дека никој не е оставен сам“– вели Јованка Брајовиќ Григоријевиќ, УНФПА.

Сите овие партнерски организии заедно се вклучија и во кампањата за подигнување на свеста за важноста од превентивните прегледи и навременото откривање на ракот на грлото на матката. Кампањата започна во јануари, месецот кога се одбележува борбата против ракот на грлото на матката, но продолжува и во наредниот период. За таа цел беше промовиран видео спот,кој се емитуваше на сите национални телевизии и на социјалните мрежи каде исто така се презентираа пораки за важноста од превенциијата. Мотото на кампањата е „Еден преглед може да спаси живот Прегледај се заштити се“. 

“Безбедни и иновативни здравствени услуги во време на COVID-19 во Северна Македонија” е заедничка програма што им помогна на властите да се зголеми пристапот до основни здравствени услуги во контекст на COVID-19 преку надоградба на веќе направените, значајни инвестции за зајакнување на здравствениот и социјалниот систем, спречување на ширењето на пандемијата, и обезбедување на соодветен здравствен одговор во разни здравствени кризи.

Програмата се имплементира од три агенции на Обединетите нации, Фондот за население на ОН - УНФПА, Фондот за деца на ОН - УНИЦЕФ, и Светската Здравствена Организација - СЗО, во координација со Канцеларијата на Постојаниот координатор на Обединетите нации во Северна Македонија, како и во партнерство со клучни национални партнери, вклучувајќи го Министерството за здравство, Министерството за труд и социјални политики. Вклучени се и директоратот за e-Здравство, Здружението на гинеколози и обстетричари, Комитетот за безбедно мајчинство и новороденчиња, Македонското здравствено здружение, Македонското здружение на сестри и акушерки, Универзитетската клиника за Психијатрија и граѓански организации.