Министерот за надворешни работи и надворешна трговија, Тимчо Муцунски и Постојаната координаторка на Обединетите нации во Република Северна Македонија, Рита Колумбија, денеска го одржаа првиот состанок на Заедничкиот управувачки комитет за спроведување на новата Рамка за соработка за одржлив развој помеѓу Обединетите нации и Северна Македонија за периодот 2026–2030 година.На состанокот беа усвоени заедничките работни планови за претстојниот период. Воедно, беше направен осврт на досегашните достигнувања во спроведувањето на Рамката за соработка, како и на приоритетите за наредниот период.Во своето обраќање, министерот Муцунски истакна дека улогата на Обединетите нации останува клучна како платформа за дијалог, двигател на развојните политики и гарант на меѓународниот поредок заснован на правила.„Особено значајно е што влегуваме во нов циклус на глобално лидерство во системот на Обединетите нации, со претстојниот избор на нов генерален секретар. Тоа отвора нова можност за дополнително зајакнување на ефективноста, реформите и релевантноста на Организацијата во справувањето со современите предизвици, како и за обновување и зацврстување на довербата во мултилатерализмот. Новата Рамка за соработка 2026–2030 претставува стратешка основа за понатамошно продлабочување на партнерството меѓу Владата и системот на Обединетите нации“, истакна Муцунски.
Постојаната координаторка на ОН, Рита Колумбија, ја нагласи важноста на заедничките напори на сите општествени чинители во процесот на одржлив развој и изрази благодарност за нивниот придонес.„Во 2025 година, Обединетите нации во Северна Македонија дејствуваа обединето во поддршка на националните приоритети на државата, истовремено завршувајќи ја Рамката за соработка 2021–2025 и поставувајќи ги основите за новата визија за периодот 2026–2030 година. Постигнатиот напредок е заеднички успех. Им благодарам на Владата за цврстото партнерство, како и на нашите развојни партнери за довербата, поддршката и соработката. Особено ја ценам улогата на граѓанските организации, академската заедница, младинските и женските организации, како и приватниот сектор, чии придонеси беа од суштинско значење. Заедно градиме позелена и поздрава иднина за генерациите што доаѓаат“, истакна Колумбија.Во рамки на дискусијата, членовите на Заедничкиот управувачки комитет од Владата и Тимот на Обединетите нации во земјата разменија мислења за приоритетите на Владата во тековниот период, како и за натамошната поддршка што системот на ОН може да ја обезбеди во спроведувањето на националните развојни цели и новата Рамка за соработка за периодот 2026–2030 година.

3 јуни 2026, Скопје - Дванаесетгодишниот Томо Поповски од Скопје е избран за еден од глобалните победници на Ликовниот конкурс по повод Светскиот ден на храната 2025, организиран од Организацијата за храна и земјоделство на Обединетите нации (ФАО), што претставува четврти пат млад уметник од Северна Македонија да биде препознаен меѓу победниците на светско ниво.Ученик во седмо одделение во ООУ „Кочо Рацин“, Томо победи во категоријата од 9 до 12 години со својот цртеж инспириран од темата на конкурсот – „Рамо до рамо за подобра храна и подобра иднина“, која ја истакнува итната потреба од заедничка акција и глобална солидарност за градење мирна, одржлива и просперитетна иднина во која секој човек има пристап до здрава исхрана. Неговото уметничко дело прикажува луѓе од различни култури кои работат заедно околу нашата планета, опкружени со разновидна и здрава храна што симболизира соработка, одржливост и надеж. Преку својот цртеж, Томо пренесува едноставна, но моќна порака: кога луѓето работат заедно, можат да ги надминат предизвиците и да создадат подобра иднина за сите. „Мојот цртеж е инспириран од идејата дека луѓето можат да постигнат големи нешта кога работат заедно“, вели Томо. „Храната не е само нешто што ни е потребно за да преживееме; таа е нешто што ги поврзува семејствата, заедниците и народите.“ Томо е четвртиот млад уметник од Северна Македонија кој добива глобално признание на Ликовниот конкурс по повод Светскиот ден на храната на ФАО, по Сара Цветкова (2019), Павел Милановски (2020) и Михаела Стојменовиќ (2022). Нивните успеси ја одразуваат креативноста и растечката свест на младите во Северна Македонија за прашањата поврзани со обезбеденоста со храна, земјоделството и заштитата на животната средина.Рамо до рамо за подобра иднинаСекоја година, Ликовниот конкурс по повод Светскиот ден на храната на ФАО ги охрабрува децата и младите од целиот свет преку уметност да ја споделат својата визија за подобра иднина. Темата – „Рамо до рамо за подобра храна и подобра иднина“ – ја слави моќта на солидарноста и заедничкото дејствување во градењето свет во кој секој има пристап до здрава исхрана и живее во хармонија со природата. Преку своето уметничко дело, Томо нè потсетува дека подобрата иднина започнува со соработка. „Работејќи заедно, почитувајќи ја природата и обезбедувајќи храна за сите, можеме да создадеме свет кој е поздрав, похуман и поодржлив“, вели Томо. „Мојот цртеж е симбол на единство, солидарност и надеж за идните генерации.“Како четврти глобален победник од Северна Македонија на овој ликовен конкурс, Томо се приклучува на извонредна група млади уметници чии дела придонесоа глобалното внимание да се насочи кон обезбеденоста со храна, одржливото земјоделство и важноста на заедничкото дејствување за подобра иднина. Неговиот успех уште еднаш покажува дека младите од нашата земја имаат важен глас во глобалната дискусија за иднината на храната, животната средина и нашата планета.Прочитајте повеќе:Сара Цветкова од Скопје, победничка во 2019 година, која преку својот цртеж ја промовираше заштитата на пчелите за постигнување свет без гладПавел Милановски од Куманово, победник во 2020 година, кој преку својот цртеж го претстави земјоделецот како херој на хранатаМихаела Стојменовиќ  од Скопје, победничка во 2022 година, која ја истакна важната улога на малите земјоделци во обезбедувањето разновидна и хранлива храна Сите победници на Ликовниот конкурс по повод Светскиот ден на храната 2025.

14/05/2026. Душанбе, Таџикистан – Министри и високи претставници од Европа и Централна Азија, од 11 до 15 мај 2026 година, престојуваат во Душанбе, каде што дискутираат за зајакнување на ефикасноста, инклузивноста, отпорноста и одржливоста на агро-прехранбените системи во услови на сè поизразени климатски, економски и геополитички предизвици.35-тата сесија на Регионалната конференција на ФАО за Европа (ERC35) се одржува во главниот град на Таџикистан под главната тема: „Обединети за одржливост: Интегрирање на климатските активности, зачувувањето на биодиверзитетот и обновата на земјиштето за одржливи агро-прехранбени системи во Европа и Централна Азија.“Конференцијата, која се организира на секои две години, претставува највисокото раководно тело на ФАО за Европа и Централна Азија и им овозможува на земјите членки и партнерите да дискутираат за најактуелните прашања во областа на храната и земјоделството, како и да ги дефинираат приоритетите на ФАО за следниот двегодишен период.Во своето обраќање пред учесниците на министерската конференција, генералниот директор на ФАО, Ку Донгју (Qu Dongyu), истакна дека предизвиците со кои се соочува регионот – климатските промени, економските притисоци и нарушувањата во глобалните синџири на снабдување – ги надминуваат националните граници и бараат заеднички пристап, координирана акција и солидарност.Тој нагласи дека фокусот на дискусиите треба да биде ставен на две клучни области: зајакнување на отпорноста на агро-прехранбените системи и обезбедување финансиски ресурси за нивна долгорочна трансформација и одржливост.Конференцијата се одржува во период кога земјите од Европа и Централна Азија се соочуваат со сè поизразени климатски шокови, нестабилност на пазарите и геополитички тензии, но и со сериозни предизвици како што се губењето на биодиверзитетот, недостигот на вода и зголемениот притисок врз достапноста на храната за населението.И покрај делумната стабилизација на глобалните пазари на храна по ценовните шокови во 2022 година предизвикани од војната во Украина, голем број земји од регионот и понатаму се соочуваат со високи цени на храната и зголемени трошоци за земјоделско производство, дополнително засилени од тековните случувања на Блискиот Исток.Ку потсети и на заклучоците од 180-тата специјална сесија на Советот на ФАО, каде што повторно било истакнато дека мирот и стабилноста се предуслов за сигурноста на храната, а правото на храна е основно човеково право. Тој нагласи дека е неопходна заедничка акција за ублажување на последиците од конфликтите врз ранливите категории на население и за обезбедување непречен пристап до храна, семе и ѓубрива за оние на кои им се најпотребни.Во однос на климатските предизвици, беше посочено дека Европа и Централна Азија се затоплуваат со темпо речиси двојно побрзо од глобалниот просек, што придонесува за почести суши, поплави, шумски пожари и дополнителен притисок врз земјоделството.Неодамнешните екстремни временски појави низ регионот, според Ку, се јасен сигнал дека досегашните модели на работа повеќе не се одржливи. Воедно, повеќе од 90 милиони хектари земјиште во Европа и Централна Азија се проценуваат како деградирани, што дополнително ја нагласува потребата од итни и координирани активности.Генералниот директор посочи дека ФАО има јасна насока за дејствување преку Стратешката рамка 2022–2031, заснована на концептот „Четири подобри“ – Подобро производство, Подобра исхрана, Подобра животна средина и Подобар живот, без никој да биде изоставен.Од 2015 година досега, финансиските средства насочени кон развој на агро-прехранбените системи во Европа и Централна Азија достигнале околу 21,4 милијарди американски долари, но, како што истакна Ку, тие сè уште не се доволни за да одговорат на реалните потреби на регионот.Во услови на ограничени јавни буџети и намален прилив на приватен капитал, особено за малите и средни претпријатија, генералниот директор на ФАО повика на продлабочена соработка меѓу владите, развојните банки, меѓународните финансиски институции и приватниот сектор со цел обезбедување поголеми инвестиции во одржливи и отпорни агро-прехранбени системи.Линк за преземање на видео пакетот со shotlist и сценарио: https://digital-media.fao.org/Detail/2A6XC5LT6XBY   

Скопје, 28 април 2026 – По повод Светскиот ден за безбедност и здравје при работа, денес во Хотел Александар Палас во Скопје се одржа настан посветен на психосоцијалните аспекти на работата, стресот, менталното здравје на работниците и потребата од создавање здрави психосоцијални работни средини. Настанот беше организиран од Советот за безбедност и здравје при работа на Република Северна Македонија, поддржан од проектот „Кон безбедна и здрава работна средина во Северна Македонија“. Проектот го имплементира Меѓународната организација на трудот (МОТ) со финансиска поддршка од Европската Унија.Во фокусот на настанот беше пораката дека безбедноста и здравјето при работа не се сведуваат само на физичка заштита, туку подразбираат и системска грижа за менталната благосостојба, организацијата на работата, превенцијата на стресот и создавањето работни средини во кои луѓето можат да работат достоинствено, безбедно и продуктивно. Оваа тема е во согласност и со пошироките цели на проектот, кој има за цел да придонесе кон посовремена, поинтегрирана и превентивна национална рамка за безбедност и здравје при работа, усогласена со стандардите на МОТ и ЕУ. Настанот беше отворен со поздравни обраќања на претставници на институциите, Европската Унија, МОТ, работодавачите, синдикатите и Советот за безбедност и здравје при работа, кои упатија заедничка порака дека справувањето со современите ризици на работното место бара координиран пристап, силен социјален дијалог и јасна определба за превенција. Г-дин Гани Максути, директор на Државен инспекторат за труд, во состав на Министерството за труд и социјална политика, истакна дека „компаративно со податоците за 2024 година, имаме намалување кај повредите при работа со смртни последици. Тоа е 13 во сооднос со 8 — значи минус 5 смртни случаи. За БЗР, планирани надзори за 2025 беа 8,922 надзори, а извршени се 10,748, при што имаме зголемување од 20%“. Додавајќи дека „само со системски пристап од сите релевантни чинители може да се овозможи несаканите последици, како што се тешки повреди со смртни последици и повреди при работа, професионалните болести и болести поврзани со работа, да се сведат на минимум. Нашата заложба останува јасна: професионален, транспарентен и ефикасен Инспекторат кој работи во интерес на државата, работниците и законитото работење на стопанството“.  Г-дин Александру Албу, Советник на Делегацијата на Европската Унија во Северна Македонија, порача дека „Европската Унија силно ја поддржува Северна Македонија во напорите да изгради модерна култура на превенција со европски стандарди за безбедност и здравје при работа кон целосен пристап кон благосостојбата на работниците:
„Работата не е само договори, плати или продуктивност. Таа е достоинство, баланс, почит и ментална благосостојба. Затоа Европската Унија поддржува градење култура на превенција, каде што условите за работа ги штитат и зајакнуваат луѓето, наместо да ги преоптоваруваат“.Проф. д-р Јасмина Чалоска, Претседателка на Советот за БЗР, нагласи дека „безбедноста и здравјето при работа не смеат да бидат тема на јавноста само кога ќе се случи трагедија на работното место. Тие мора да бидат постојан приоритет и дел од секојдневното работење.Ова е област која не трпи одложувања, политиканство или суети. Напротив, бара исклучително високо ниво на индивидуална и колективна одговорност од сите учесници во системот.Искрено се надевам дека во иднина ќе сведочиме на значително намалување на ваквите настани, па дури и на нивно целосно спречување“.Г-ѓа Владанка Трајкоска, Претседателка на ОРМ, истакна дека работодавачите имаат важна улога во создавањето здрави организациски култури:
„Дизајнирањето на здрави психосоцијални работни средини мора да се гледа како процес: од подигнување на свеста, кон конкретни мерки и системски пристап. Тоа значи отворена комуникација, превенција на стрес, поддршка на вработените и градење организациска култура во која менталното здравје е приоритет“.Г-дин Слободан Трендафилов, Претседател на ССМ, потенцираше дека „мораме да се сеќаваме на мртвите, а да се бориме за живите. За жал, денеска во Македонија не е безбедно да дојдете на работа и да се вратите дома — поздравувањето со семејството пред одење на работа не смее да биде последно. Денеска зборуваме за психосоцијалните ризици на работните места, но не смееме да ги заборавиме и психосоцијалните ризици со кои се соочуваат семејствата кои загубиле најблизок поради несреќа на работа. Наместо да се соочуваме со 72-часовни работни недели кои се надвор од сите меѓународни стандарди, мораме преку колективни договори да ја бетонираме заштитата и достоинството на работникот.“Г-дин Ангел Панев, Потпретседател на Совет за БЗР при КСС, посочи дека темата бара вклучување на сите социјални партнери:
„Овој ден е комеморација за сите кои ги загубиле своите животи на работните места, но и обврска за сите нас – социјалните партнери, струката и науката – да создадеме услови во кои идните генерации ќе имаат многу помалку проблеми на своите работни места.“Г-дин Емил Крстановски, Национален координатор – МОТ, повика кон неопходна итна трансформација, истакнувајќи дека:
„Луѓето кои ги губат своите животи при работа или поради работата не се само статистика — тие се нечии синови, ќерки, браќа, сестри, родители и сопружници. Мораме да се вратиме на темелните вредности на нашето општество: солидарноста и социјалната правда, наместо алчноста и сервилноста“. Во рамки на стручниот дел од програмата, проф. д-р Сашо Столески говореше за психосоцијалните аспекти на работата, акцентирајќи ја важноста на превенцијата од психосоцијални ризици преку соодветен дизајн и организација на работата. Тој ја истакна заедничката одговорност на работодавачите, вработените и медицината на трудот во градењето култура на отворена комуникација, доверба и психолошка безбедност, со цел да се намали синдромот на согорување и да се поттикне продуктивна работна средина. Потоа, проф. д-р Драган Мијакоски се осврна на стресот и менталното здравје на работниците во контекст на европската истражувачка област, нагласувајќи ја клучната улога на европските мрежи (како COST акциите) во креирањето на докажани стратегии за интервенција. Тој истакна дека овие прашања бараат повеќеслоен пристап кој ги обединува научните истражувања и практичните решенија, со посебен фокус на новите предизвици како влијанието на климатските промени врз благосостојбата на вработените.Во продолжение следуваа и онлајн вклучувања од меѓународни експерти на МОТ. Г-ѓа Клер Харасти, Директор на Канцеларијата на МОТ за Централна и источна Европа во Будимпешта, Жоаким Нунес Пинтадо, раководител на сектор за безбедност и здравје при работа во МОТ Женева, даде воведни согледувања за значењето на темата на глобално ниво, додека Манал Ази, експерт за политики и системи за безбедност од МОТ Женева, говореше за психосоцијалната работна средина: глобални трендови и насоки за делување, со осврт на потребата од политики што ја ставаат превенцијата во центарот.  Особено значаен дел од програмата беше презентацијата „Зошто психосоцијалната работна средина е важна? Искуство од Норвешка“, во која Каролине Гродал, виш советник во Норвешкиот авторитет за инспекција на трудот, сподели практични искуства и пристапи за тоа како институциите и работните организации можат системски да ги препознаваат и управуваат психосоцијалните ризици. Овој меѓународен пример даде дополнителна перспектива за тоа како превенцијата може да се претвори во реални механизми и политики. Во сесијата посветена на проектот, Милан Петковски, проектен координатор при МОТ, се осврна на психосоцијалните рефлексии низ призмата на проектот „Кон безбедна и здрава работна средина во Северна Македонија“, нагласувајќи дека иако системот за безбедност и здравје при работа функционира (со 26.484 инспекциски надзори и 6.359 утврдени неправилности), податоците покажуваат дека фокусот сè уште е претежно на видливите, физички ризици. Во исто време, психосоцијалните ризици остануваат недоволно препознаени и евидентирани, иако имаат директно влијание врз здравјето, продуктивноста и организациската култура. Настанот заврши со интерактивна работилница на тема „Дизајнирање здрави психосоцијални работни средини: од свесност до акција“, што ја водеа проф. д-р Драган Мијакоски и проф. д-р Сашо Столески. Работилницата овозможи дополнителна размена на ставови и искуства меѓу учесниците и отвори простор за дискусија за конкретни чекори што можат да се преземат во институциите, компаниите и организациите за подобра превенција и унапредување на менталната благосостојба на работното место. Со денешниот настан беше испратена јасна порака дека иднината на безбедноста и здравјето при работа зависи од способноста на системот да ги препознае и адресира сите ризици – видливи и невидливи. Психосоцијалната работна средина, менталното здравје и квалитетот на работниот живот се важен дел од таа слика и мора да бидат интегрирани во јавните политики, институционалните практики и секојдневното функционирање на работните места.Проектот „Кон безбедна и здрава работна средина во Северна Македонија“ продолжува да работи на јакнење на националната рамка за безбедност и здравје при работа преку реформи, институционално јакнење, дигитализација, поддршка на социјалните партнери и подигање на јавната свест, со крајна цел – побезбедни, поздрави и поодржливи работни места за сите.